ОРГАНИЗАЦИЯ КОНЦЕРТОВ И ВЫСТУПЛЕНИЙ: +7 701 949 1936

ОРГАНИЗАЦИЯ КОНЦЕРТОВ И ВЫСТУПЛЕНИЙ: +7 701 949 1936

«Ярайсиләр, жигитләр!»

«Ярайсиләр, жигитләр!»

«Уйғур авази» гезити, 30 март 2017 ж.

Бәхтишат СОПИЕВ, «Уйғур авази»/ «Дәрвишләр» топиниң концертини тамашә қилған тонулған композитор Адилҗан Җанбақиевниң кәсипдашлириға бәргән баһаси әйнә шундақ болди. «Дәрвишләр» топиниң мухлислири Җумһурийәт сарийиға күндүзи саат бирләрдин кейинла жиғилишқа башлиди. Бәзиләр буни шәһәрдики «пробкиға» җориди. Биз болсақ, тамашибинлиримизниң үзидин сеғинишниң бәлгүлирини сәздуқ. Чүнки «Дәрвишләр» өз мухлислири билән ахирқи қетим 2010-жили дидарлашқан.

Гезитимиздә илгири хәвәр қилғинимиздәк, «Дәрвишләр»  мухлислириниң тәливигә бола бир күндә икки концерт қоймақчи болди.  Биринчи концерт саат үчкә бәлгүлинип, у дәл вақтида башланди. Залда дапниң садаси яңриғандин кейин концертниң «тизгинини» топниң солисти, нахшичи һәм композитор Дилмурат Баһаров өз қолиға алди. «Саламалейкум» нахшиси билән тамашибинларға салимини йоллиған топ әзалири бирдинла уларниң жүрәк тарлирини тәвритивәтти.  Дилмурат өзлири иҗра қиливатқан нахшилар мәтинлириниң муәллиплири билән аһаңини язған композиторларни тонуштурушниму унтумиди. Шундақ муәллипләрниң бири, атақлиқ шаир, мәрһум Абдумеҗит Дөләтов еди. У «Дәрвишләрниң» мухлислири ядқа билидиған «Тойнамә», «Амма» «Вәтән», «Ата» нахшилириниң мәтинини язған. Һазир униң йолини шаир Иминҗан Тохтияров давамлаштуруватиду. Бу қетимқи концертта униң көплигән нахшилири иҗра қилинди. Дилмурат топниң сазәндиси, мәрһум Әзиз Мәсимовниң исминиму әскә алди. У Әзизниң яхши көридиған нахшисини иҗра қилип, залдикиләрни уссулға чақирди.

Шуниңдин кейин тамашибинлар «Дәрвишләр» билән бирликтә «Тойнамини» иҗра қилди. Мәзкүр концертқа меһман сүпитидә қатнашқан эстрада юлтузлири Адилҗан Өмәров билән Равшан Тохтахунов дәрвишләрниң нахшилирини Дилмурат билән бирликтә орунлиди. Тарихий вәтинимиздин кәлгән Санийәм Исмайилниң (у әсли қазақстанлиқ — Б.С.) йеңи нахшилириму көпчиликниң көңлидин чиқти. У Дилмурат Баһаров билән бирликтә «Бизниң нахша»  намлиқ йеңи нахшини иҗра қилди. «Бизниң нахшиға» хәлқимизниң пүтүн бир мәдәнийити қачилинипту. Бу нахша тамашибинларға йеқипла қалмай, уларни ойға селип өтмүшни әсләтти. «Дәрвишләрниңму» бизниң бай сәнъитимизгә қошқан үлүши көп екән» дегән хуласигә кәлди тамашибинлар мәзкүр нахшини тиңшаветип.

Концерттин кейин залда «Дәрвишләрниң» асасини салған Адилҗан Җанбақиев билән учришип қалдим.

— Концерт яқтиму? — соридим униңдин.

— Әлвәттә, «Ярайсиләр, жигитләр!», деди у сәһнидә мухлислиридин айрилғуси кәлмәй турған «Дәрвишләргә» қарап.

Концерт һечбир фонограммисиз «җанлиқ» өтти. Кәспий сәнъәткар кәсипдашлириниң мошу тәрипигә алаһидә диққәт ағдурғанлиғини йошурмиди.

Фото © Nikolay Postnikov

http://uyguravazi.kazgazeta.kz/?p=29052#more-29052

Добавить комментарий


Защитный код
Обновить

fashion journal